Монгол улсын нийт хүн амын 69 хувийг 15-аас дээш насныхан эзэлж байна. Дээрхи насныхны 60 гаруй хувийг гэр бүлтэй иргэд эзэлдэг гэх судалгаа байна. Давхар тэтгэвэр буюу хамтын тэтгэврийн хуулийн үндсэн зорилт нь гэр бүлийн бат бэх харилцааг бэхжүүлэхэд оршиж байгаа гэж хууль санаачлагчид үзжээ. Тодруулж хэлбэл эхнэр нөхөр хоёрын аль нэг нь түрүүлж нас нөгчихөд 5 жилийн хугацаанд нөхөр нь эхнэрийнхээ, эхнэр нь нөхрийнхөө тэтгэврийг үргэлжлүүлэн авах хууль юмаа. Энэ хууль эрэгтэй 60, эмэгтэй 55 насны гэр бүлд хүчин төгөлдөр үйлчилнээ. Харин их хурлын зарим гишүүд энэ хуулийг шоу болчих вий хэмээн хардаж байгаагаа хэллээ. Хэрвээ өгөх гэж байвал заавал үхсэний дараа биш амьдад нь тэтгэврийг нэмэх ёстой гэдгийг сануулж байлаа.
Хамтын тэтгэврийн тухай хууль 15 бас түүнээс дээш жил ханилж гэрлэлтээ батлуулсан эхнэр нөхөрт үйлчилнэ. Харин 20 ба түүнээс дээш насны зөрүүтэй болон гэрлэлтээ батлуулаагүй, тусдаа амьдарч буй гэр бүл хамтын тэтгэвэр авах боломжгүй юм. Урьдчилсан тооцооллоор эхний ээлжинд 76 мянган иргэн хамтын тэтгэврийг авах байх гэдгийг хэлж байна.Хуулийг албан ёсоор 2014 оны нэгдүгээр сард өргөн барьсан ч олон чуулган дамнан яригдсан гэдгийг хэлж байлаа. Хууль хэрэгжиж эхлэхэд улсын төсөвт 10 орчим тэрбум төгрөгний ачаалал үүснэ гэж үзэж байна.
Ийнхүү Монгол Улс Ахмад настанд чиглэсэн нийгмийн хамгааллын хамгийн том бодлогоо баталлаа. Хуулийн төслийг үндсэн хууль болон нийгмийн даатгалын болон тэтгэвэр тэтгэмжийн тухай хуультай нийцүүлэн боловсруулсан учраас холбогдох хуулиудад өөрчлөлт орохгүй юм байна.
Эх сурвалж: http://www.ubs.mn/news/10617