БАЯНХОНГОР АЙМГИЙН ЖАРГАЛАНТ СУМЫН

СУМ ДУНДЫН ЭМНЭЛГЭЭР ҮЙЛЧЛҮҮЛЭГЧДИЙН СЭТГЭЛ

ХАНАМЖИЙН СУДАЛГААНЫ ДҮГНЭЛТ

         Судалгааны зорилго нь: үйлчлүүлэгчдийн сэтгэл ханамжид тулгуурлан тусламж үйлчилгээний чанар, аюулгүй байдал, удирдлага зохион байгуулалтыг оновчтой болгоход нотолгоогоор хангахад оршино. Энэхүү судалгаанд Баянхонгор аймгийн Жаргалант сумын

төвийн болон хөдөөгийн 3 багийн 341 өрх хамрагдав. 

СУДАЛГААНЫ ДҮГНЭЛТ:

         УИХ-ын Тамгын газар, Швейцарын хөгжлийн агентлаг, НҮБ-ын Хөгжлийн хөтөлбөрийн хамтран хэрэгжүүлж буй “Нутгийн өөрөө удирдах байгууллагын чадавхийг бэхжүүлэх нь” төслийн хүрээнд сумын Иргэдийн Төлөөлөгчдийн Хурлаас Сум дундын эмнэлгийн төрийн үйлчилгээний чанар хүртээмжид хяналт тавих төсөл хэрэгжүүлж, төслийн хүрээнд Сум дундын эмнэлгийн үйлчилгээний талаар иргэдийн сэтгэл ханамжийн судалгааг авсан.

          Сум дундын эмнэлгийн тусламж үйлчилгээний талаар 6 бүлэгт 34 асуулгаар санал асуулга авлаа. Санал асуулгыг 2015 оны 11 дүгээр сарын 03-ны өдрөөс 11 дүгээр сарын 07-ны өдрүүдэд сумын төв болон хөдөөгийн гурван багийн 340 өрхөөс ИТХ-ын төлөөлөгчдөөр дамжуулж авсан. Судалгаанд Нам толгой 1 дүгээр баг 76 өрх, Өлзийт өндөр 2 дугаар баг 66 өрх, Хөндлөн булаг 3 дугаар баг 94 өрхөөс Эмээл толгойн 4 дүгээр багийн 105 өрхийн нийт 341 өрх хамрагдсан.

Нэг. Байгууллагын соёл:

          Байгууллагын үйл ажиллагааны талаарх танилцуулгын ил тод, нээлттэй байдал 47,2 хувь, Бүртгэх, лавлах үйлчилгээний талаар шаардлагатай мэдээллийг иргэд, үйлчлүүлэгчдэд ил тод, нээлттэй, харагдахуйц хэмжээнд байрлуулсан 51,8 хувь, Байгууллагын ажилтны нэгдсэн  загвар бүхий хувцаслалт, энгэрийн тэмдэг 65,1 хувь, Байгууллагын дотоод орчны соёл, тав тух 61,8 хувь, Байгууллагын үзлэг, оношлогооны  өрөөнүүдийн хаягжилт 73,8, Байгууллагын гадаад орчны тохижилт 63,6 хувь нь сайн гэж хариулсан нь ба дээрх асуултуудад 90-ээс дээш хувь хувь дундаас дээш гэж хариулсан эмнэлгийн байгууллагын соёл, үйлчилгээний байдалд иргэдийн сэтгэл ханамж хангалттай байна гэж дүгнэлээ. 

Хоёр. Эмнэлгийн мэргэжилтний ёс зүй, үйлчилгээний соёл:

          Эмчийн угтах, мэндлэх, найрсаг харилцаа, үйлчлэх соёл 46,6 хувь, Сувилагч, эмнэлгийн мэргэжилтний угтах, мэндлэх, найрсаг харилцаа үүсгэх соёл 38,4 хувь, Эмчийн сонсох, зөвлөгөө өгөх ур чадвар 60,3 хувь, Сувилагч, эмнэлгийн мэргэжилтний сонсох, зөвлөгөө өгөх ур чадвар 45,3 хувь, Үйлчлүүлэгчийн нууц хадгалалтад итгэх итгэл 36,8 хувь, Эмч, ажилчдын ажлын цаг баримтлалт 35 хувь нь сайн гэж хариулсан нь эмнэлгийн ажилчдын ёс зүй, үйлчилгээний соёлд иргэд сэтгэл хангалуун биш байгаа нь судалгааны дүнгээс харагдаж байна. 

Гурав. Тусламж, үйлчилгээний чанар, аюулгүй байдал:

         Эмч, эмнэлгийн мэргэжилтний ажлын хариуцлага, шуурхай байдал 27,1 хувь Оношлогоо, эмчилгээний чанар, аюулгүй байдал 39,8 хувь, Сувилахуйн тусламж, үйлчилгээний чанар, аюулгүй байдал 40,1 хувь, Эмнэлгийн үйлчилгээний аюулгүй байдлын талаар анхааруулга, мэдээлэл өгдөг байдал 37,6 хувь, Эмнэлгийн тоног төхөөрөмжийн аюулгүй байдал 52,6 хувь нь сайн гэж хариулсан нь оношлогоо эмчилгээнд сүүлийн үеийн тоног төхөөрөмж, эмнэлгийн багаж хэрэгслийг ашиглах, нэвтрүүлэх, эмчилгээ, үйлчилгээний аюулгүй байдлыг хангах, эрүүл мэндийн чиглэлээр зөвлөгөө, анхааруулгыг авах хэрэгцээ байгааг харуулж байна. Асаргаа, хүнд өвчтөн, хөгжлийн бэрхшээлтэй иргэдэд үзүүлэх үйлчилгээнд сэтгэл дундуур байна. /22 хувь нь сайн/

          Эм, тарианы хүрэлцээ, хангамжийн байдал 13,1 хувь сайн, 38,6 хувь нь дунд, 48,1 хувь нь муу гэж хариулсан нь эм, тарианы хүрэлцээ, хангамж хангалтгүй байна гэж дүгнэлээ. Халдвар хамгааллын дэглэм, эрүүл ахуй, аюулгүй байдал 51,0 хувь, Эмнэлгийн угаалга, цэвэрлэгээ 65,1 хувь, Эмнэлгийн халаалт, усан хангамжийн хүрэлцээ, хангамж 33,2 хувь, Барилга байгууламжийн эрүүл ахуй, аюулгүй байдалд 56,9 хувь нь сайн гэсэн нь эмнэлгийн цэвэрлэгээ үйлчилгээнд сэтгэл ханамжтай, барилга байгууламж, цахилгаан, халаалт, усан хангамж, өрөө тасалгааны байршил, зохион байгуулалтыг сайжруулах хэрэгтэй байна гэж дүгнэж байна.

           Таниас түргэн тусламжийн машины бензины мөнгө авдаг уу? Гэсэн асуултад үйлчлүүлэгчдийн 40 хувь нь авсан гэж хариулсан байна.  Хэрэв түргэн тусламжийн мөнгө авсан бол буцааж олгосон уу? гэсэн асуултад 11 хувь нь буцааж олгосон, 41 хувь нь олгоогүй гэж хариулсан нь түргэн туламжийн мөнгийг үйлчлүүлэгчээс авсан тохиолдолд буцааж олгож байх шаардлагатайг харуулж байна. 

Дөрөв. Удирдлага зохион байгуулалт:

           Байгууллагын удирдлагаас иргэдийн оролцоог дээдэлдэг, уулзаж, санал бодлыг сонсдог, шийдэж өгдөг байдал 22,1 хувь, Эрүүл мэндийн мэдээлэл, сургалт, сурталчилгааны зохион байгуулалт 30,9 хувь нь сайн гэж хариулсан нь эмнэлгийн байгууллага, иргэдийн уялдаа холбоо, хэрэгцээ шаардлагыг хангах талаар хангалтгүй байгаагийн зэрэгцээ иргэдэд эрүүл мэндийн сургалт сурталчилгааг хангалтгүй хийдэг, тэдний хэрэгцээг хангаж чадахгүй байна гэж дүгнэв. 

Тав. Тэгш байдал, ашиг сонирхол:

           Эмч, эмнэлгийн мэргэжилтэн нь хувийн эмнэлэг, эм, эмийн сан, сүлжээ санал болгодог уу гэсэн хариултанд 17,7 хувь нь  тийм гэж хариулсан нь эмчилгээ, үйлчилгээнд ашиг сонирхлын зөрчил байж болзошгүй гэж дүгнэв. Эмнэлгийн түргэн тусламжийн үйлчилгээний чанар, дуудлага хүлээн авах үйлчилгээний талаар та юу гэж бодож байна гэсэн хариултад 44,8 хувь нь хангалттай гэж хариулсан нь сэтгэл ханамжтай байна гэж дүгнэлээ.

Зургаа. Эргэлтийн эмийн сан:

          Эргэлтийн эмийн сангийн эм, тарианы хангамж, хүрэлцээ 14,0 хувь нь сайн, 47,4 хувь нь дунд, 38,4 хувь нь муу гэж хариулсан нь эм, тарианы хүрэлцээ хангалттай бус дутагдалтай гэж харагдаж байна. Эргэлтийн эмийн сангийн эм, тарианы үнэ 86,6 хувь өндөр үнэтэй гэж хариулсан нь эм өндөр үнэтэй байгааг судалгаанаас харуулж байна. Эргэлтийн эмийн сангийн ажилтны ажлын цаг ашиглалт 38 хувь нь хангалттай, 62 хувь нь хангалтгүй гэсэн үнэлгээ өгсөн нь сэтгэл дундуур байгааг харуулж байна. Эргэлтийн эмийн сангийн ажилтны ёс зүй 33,4 хувь нь сайн, 49,1 хувь нь дунд, 17,4 хувь нь муу гэж хариулсан нь сэтгэл ханамж хангалттай гэж дүгнэж байна.

Ерөнхий сэтгэл ханамж

          Эмнэлгийн байгууллагын үйлчилгээнд иргэдийн ерөнхий сэтгэл санамж 37,7 хувь сайн, 58,0 хувь нь дунд гэж хариулсан судалгаанд хамрагдагсдын 95,7 хувь нь дундаас дээш сэтгэл ханамжтай байна гэж дүгнэлээ.

ЦААШИД АВЧ ХЭРЭГЖҮҮЛЭХ АРГА ХЭМЖЭЭ

Иргэдээс ирүүлсэн саналын дагуу цаашид дараах арга хэмжээг авч хэрэгжүүлэхийг зөвлөж байна. Үүнд:

1.Байгууллагын алсын хараа, эрхэм зорилго, үйл ажиллагааны мэдээллийг ил тод болгож, иргэдийн мэдээлэл авах эрхийг хангаж ажиллах

2. Төрийн үйлчилгээг иргэдэд хүнд суртал, чирэгдэлгүй хүргэх талаар шинэ санал санаачилга нэвтрүүлэх, ажлын цаг ашиглалтыг сайжруулах 

3.  Эмнэлгийн мэргэжилтний ёс зүйн хэм хэмжээний дүрмийг хэрэгжүүлэх, ёс зүйн хэм хэмжээг сахих талаар тодорхой ажил зохион байгуулах /Үйлчлүүлэгчдийн нууц хадгалах

3. Эм, тарианы хүрэлцээ, хангамжийг нэмэгдүүлэх талаар холбогдох дээд шатны байгууллагад санал тавьж, шийдвэрлүүлэхэд анхаарч ажиллах

4. Эмнэлгийн түргэн тусламж, дуудлага хүлээн авах үйлчилгээний чанар хүртээмжийг сайжруулж, үйлчлүүлэгчдээс түргэн тусламжийн мөнгө авсан тохиолдолд буцааж олгох ажлыг зохион байгуулах

5.Эрүүл мэндийн сургалт, сурталчилгааг тогтмолжуулах замаар иргэдийн эрүүл мэндийн боловсролыг дээшлүүлэх арга хэмжээ авах

6. Тусламж, үйлчилгээний чанар, хүртээмжийг нэмэгдүүлж, үйлчлүүлэгчдийн хэрэгцээг хангаж ажиллах

8. Эргэлтийн эмийн сангийн эм, тарианы хангамжийг нэмэгдүүлэх, эмийн үнийг бууруулах асуудлыг судалж шийдвэрлэх

СУМЫН ИРГЭДИЙН ТӨЛӨӨЛӨГЧДИЙН ХУРАЛ